काठमाडौं। बलिउड अभिनेत्री तथा भाजपा सांसद कंगना रनौतले अभिनेता ऋतिक रोशन र उनकी प्रेमिका सबा आजादको सम्बन्धमाथि खुसी व्यक्त गर्दै, आफूलाई लक्षित गरी भइरहेको अनलाइन ट्रोलिङ रोक्न आग्रह गरेकी छन्। कंगनाले इन्स्टाग्राम स्टोरीमार्फत ऋतिकलाई सम्बोधन गर्दै दुवैलाई राम्रो जोडी भनिन् र आफ्नो नाम प्रयोग गरी सामाजिक सञ्जालमा दुर्व्यवहार गर्नेहरूको ऋतिकले निन्दा गर्नुपर्ने बताइन्। उनले लेखिन् — ऋतिकले आफ्नो साँचो जोडी भेटेकोमा खुसी लागेको, दुवै प्रतिबद्ध सम्बन्धमा रहेकाले कसैलाई जिस्क्याउनु वा निशाना बनाउनु उपयुक्त नहुने र आफ्नो नाम प्रयोग गरी हुने बुलिङ रोक्न ऋतिकलाई नै भूमिका खेल्न आग्रह गरिन्। यो प्रतिक्रिया ऋतिकले सामाजिक सञ्जालमा गरेको एक टिप्पणीपछि आएको हो। एक इन्फ्लुएन्सरले ‘संसारले ऋतिकसँग माफी माग्नुपर्छ’ भन्ने आशयको पोस्ट राखेपछि ऋतिकले जवाफ दिँदै, कसैलाई अर्को व्यक्ति मन नपरेकै आधारमा समर्थन गर्ने प्रवृत्ति समाजको ठूलो समस्याको सानो अंश मात्र भएको र तथ्यमा आधारित छलफल नै न्यायपूर्ण हुने बताएका थिए। यसैबीच कंगना विद्यार्थी आन्दोलनसम्बन्धी आफ्ना टिप्पणीका कारण पनि चर्चामा छिन्। उनले प्रदर्शनका भिडियोलाई ‘घृणास्पद’ भन्दै आलोचना गरेकी थिइन् र नयाँ पुस्ताको भाषा-व्यवहारप्रति असन्तुष्टि व्यक्त गर्दै स्वतन्त्रताले जिम्मेवारी पनि बोकेको बताएकी थिइन्, जसमाथि सामाजिक सञ्जालमा मिश्रित प्रतिक्रिया आइरहेको छ।