काठमाडौं । आइतबार दिउँसो फेसबुकको ब्राउजर संस्करण अकस्मात डाउन भएको छ । साइटमा प्राविधिक समस्या देखिएपछि धेरै प्रयोगकर्ताले फेसबुक खोल्न नसकेको गुनासो गरेका छन् । फेसबुकले प्रयोगकर्तालाई देखाएको सन्देशमा भनिएको छ, ‘एकाउन्ट अस्थायी रूपमा उपलब्ध छैन । साइटमा आएको समस्याका कारण हाल तपाईंको खाता उपलब्ध छैन । हामी यसलाई चाँडै समाधान गर्ने प्रयासमा छौँ । कृपया केही समयपछि पुनः प्रयास गर्नुहोस् ।’ अनलाइन सेवाहरूको अवस्था ट्र्याक गर्ने वेबसाइट डाउनडिटेक्टरका अनुसार आइतबार दिउँसो साढे १ बजेतिरदेखि ‘फेसबुक डाउन’ भन्ने खोजीमा एकाएक उल्लेख्य वृद्धि देखिएको थियो, जसले धेरै प्रयोगकर्ता एकैसाथ समस्यामा परेको संकेत गर्दछ ।