प्रश्रय राजभण्डारीको प्रतिबद्धता : सुरक्षा, डिजिटल ठमेल र प्रभावकारी सञ्चारलाई पहिलो प्राथमिकता

ठमेल पर्यटन विकास परिषद्को आगामी निर्वाचनलाई लक्षित गर्दै आयोजित प्रश्रय राजभण्डारी समावेशी समूहका उम्मेदवारहरूको परिचयात्मक कार्यक्रममा अध्यक्ष पदका उम्मेदवार प्रश्रय राजभण्डारीले आफ्नो नेतृत्वले अघि बढाउने प्राथमिकता र योजनाबारे विस्तृत धारणा राखेका छन्। उनले परिषद्को भावी कार्यदिशा सुरक्षा व्यवस्थापन, डिजिटल प्रविधिको प्रभावकारी उपयोग र व्यवसायी तथा नेतृत्वबीच बलियो सञ्चार प्रणाली निर्माणमा केन्द्रित हुने बताएका छन्। उनका अनुसार ठमेल नेपालको प्रमुख पर्यटकीय केन्द्र भएकाले यहाँ आउने आन्तरिक तथा विदेशी पर्यटकको सुरक्षालाई पहिलो प्राथमिकतामा राख्नुपर्ने आवश्यकता छ। त्यससँगै ठमेललाई आधुनिक र प्रविधिमैत्री बनाउँदै डिजिटल ठमेलको अवधारणालाई व्यवहारमा लागू गर्नुपर्ने र परिषद्का गतिविधिलाई डिजिटल माध्यममार्फत थप प्रभावकारी बनाउनुपर्ने उनले बताए।

राजभण्डारीले परिषद्का पदाधिकारी र व्यवसायीबीच नियमित संवाद तथा समन्वयको अभाव रहेको उल्लेख गर्दै आफू निर्वाचित भएमा दुवै पक्षबीच सहज, पारदर्शी र प्रभावकारी सञ्चार प्रणाली विकास गर्ने प्रतिबद्धता व्यक्त गरे। उनले परिषद्ले व्यवसायीका समस्या, सुझाव र आवश्यकतालाई समयमै सम्बोधन गर्न सक्ने वातावरण निर्माण गर्नु आवश्यक रहेको बताए। आफूले सार्वजनिक रूपमा घोषणा गरेका एजेन्डा कुनै नारामा मात्र सीमित नभई कार्यान्वयनयोग्य योजना भएको उल्लेख गर्दै व्यवसायीहरूको विश्वास जित्ने गरी काम गर्ने प्रतिबद्धता जनाए।

निर्वाचनलाई उनले व्यक्तिगत प्रतिस्पर्धाभन्दा पनि व्यवसायिक नेतृत्व चयनको प्रक्रिया भएको बताए। आफू सत्य, पारदर्शिता र व्यवसायीको हितको पक्षमा उभिएको उल्लेख गर्दै मतदातालाई लोकतान्त्रिक ढंगले निर्णय गर्न आग्रह गरे। उनले आफ्नो भनाइलाई धार्मिक प्रतीकसँग जोड्दै जहाँ सत्य हुन्छ त्यहाँ कृष्ण र अर्जुनको साथ रहने उल्लेख गरे। मतदातालाई कृष्णसँग तुलना गर्दै उम्मेदवारहरू व्यवसायिक परिवर्तनका लागि लडिरहेका पाण्डवजस्तै रहेको उनको भनाइ थियो। उनले निर्वाचनलाई विवाद वा विभाजनको माध्यम नभई परिषद्को भविष्य निर्धारण गर्ने अवसरका रूपमा लिनुपर्ने धारणा राखे।

युवा नेतृत्वको विषयमा पनि उनले विशेष जोड दिए। लामो समयदेखि नेतृत्वमा नयाँ पुस्ताले अपेक्षाअनुसार अवसर नपाइरहेको उल्लेख गर्दै अब युवालाई नेतृत्वमा अघि बढाउने समय आएको बताए। युवामा ऊर्जा, नयाँ सोच, प्रविधिमैत्री कार्यशैली र परिवर्तन ल्याउने क्षमता भएकाले परिषद्को नेतृत्वमा उनीहरूको सहभागिता सुनिश्चित हुनुपर्ने उनको भनाइ थियो। उनले नयाँ पुस्तालाई अवसर नदिने परम्परागत सोच परिवर्तन गर्नुपर्ने आवश्यकता औँल्याउँदै अनुभव र युवाशक्तिको संयोजनबाट मात्र ठमेल पर्यटन विकास परिषद्लाई थप सक्षम, आधुनिक र व्यवसायीमैत्री संस्थाका रूपमा विकास गर्न सकिने विश्वास व्यक्त गरे।