उखु किसानको अनुदान भुक्तानी गर्न सांसद शाहको माग
नेपाली कांग्रेसका सांसद अभिषेक प्रताप शाहले उखु किसानलाई सरकारले दिनुपर्ने अनुदान रकम यथाशीघ्र भुक्तानी गर्न माग गरेका छन् । बुधबार प्रतिनिधि सभा बैठकमा आफ्नो भनाइ राख्दै सांसद शाहले बर्दियाको राजापुर नगरपालिका–५ बदालपुरस्थित राजापुर सुगर एण्ड केमिकल इन्डस्ट्रि प्रालिले किसानसँग खरिद गरेको उखुको मूल्य त भुक्तानी गरिसकेको तर सरकारले दिनुपर्ने अनुदान रकम भने अझै नआएको जानकारी दिए । उनका अनुसार, बर्दियाको राजापुर नगरपालिका–५ बदालपुरमा २०८० साल भदौ २५ गते उद्योग विभाग, त्रिपुरेश्वरमा दर्ता भएको राजापुर सुगर एण्ड केमिकल इन्डस्ट्रि प्रालिले २०८२ साल पुस २२ देखि चैत १२ गतेसम्मको अवधिमा किसानहरूबाट लाखौँ क्विन्टल उखु खरिद गरेको थियो । सांसद शाहले कम्पनीले प्रतिक्विन्टल ६२० रुपैयाँका दरले किसानलाई तिर्नुपर्ने रकम पूरै भुक्तानी गरिसकेको तर सरकारले उखु कृषकलाई दिने भनिएको प्रतिक्विन्टल ७० रुपैयाँ अनुदान रकम भने अझै भुक्तानी नभएको उल्लेख गरे । उनले कृषि मन्त्रालयको २०७५ सालको कार्यविधि (दोस्रो संस्करण, २०७६) अनुसार किसानले पाउनुपर्ने अनुदान रकम दिन सरकारको ध्यानाकर्षण गराए । ‘मन्त्रालय आफैं यो रकम भुक्तानी गर्न आनाकानी गरिरहेको छ । त्यसैले यथाशीघ्र किसानको रकम निकासाका लागि पहल गर्न सभामुखमार्फत सरकारको ध्यान दिलाउन चाहन्छु,’ सांसद शाहले भने ।
