तातोपानी नाका नियमित सञ्चालन गर्न व्यवसायीको माग, सयौँ कन्टेनर सीमामै रोकिए

काठमाडौं । सिन्धुपाल्चोकस्थित तातोपानी–खासा नाका नियमित सञ्चालनमा ल्याउन व्यवसायीहरूले माग गरेका छन्। दशैँ, तिहारलगायतका प्रमुख चाडपर्वलाई लक्षित गरी चीनबाट आयात गरिएका सामान सीमामै रोकिएपछि व्यवसायीहरूले नाका तत्काल सुचारु गर्न आग्रह गरेका हुन्।

उद्योग, वाणिज्य तथा आपूर्ति मन्त्रालयका अनुसार तातोपानी नाका कात्तिक १ देखि ३ गतेसम्म तीन दिनका लागि सञ्चालनमा आएको छ। मन्त्रालयले जारी गरेको प्रेस नोटअनुसार उक्त अवधिमा मालवाहक सवारीसाधनलाई मात्र आवतजावतको अनुमति दिइएको छ।

तर, नेपाल हिमालय सीमापार वाणिज्य संघले तीन दिनका लागि मात्र नभई नाकालाई नियमित रूपमा सञ्चालन गर्न माग गरेको छ। संघका महासचिव रामचन्द्र पराजुलीका अनुसार यस विषयमा नेपालस्थित चिनियाँ दूतावासलाई ध्यानाकर्षण पत्र बुझाउँदै नाका सुचारु गर्न आग्रह गरिएको छ।

पराजुलीले नाका बन्द हुँदा चीनबाट सामान ल्याउन प्रतीक्षामा रहेका कन्टेनर नेपाल र चीन दुवैतर्फ रोकिएको जानकारी दिए। चाडपर्वको समयमा आवश्यक सामानको आपूर्ति प्रभावित हुँदा व्यवसायीले आर्थिक क्षति बेहोर्नुका साथै बजारमा वस्तुको अभाव हुन सक्ने उनको भनाइ छ।

हालैका गम्भीर मौसमी घटनाका कारण विभिन्न स्थलमार्गमा अवरोध तथा क्षति पुगेको अवस्थामा तातोपानी नाका सीमापार व्यापारका लागि महत्वपूर्ण विकल्प रहेको व्यवसायीहरूको भनाइ छ। दशैँ र तिहारलाई लक्षित गरी ल्याइएका सामान बोकेका सयौँ कन्टेनर सीमामा रोकिँदा व्यापार प्रभावित भएको संघले जनाएको छ।

सीमामा रोकिएका सामानमध्ये नाशवान् वस्तु, कृषि उत्पादन तथा मौसमी व्यापारका सामग्रीसमेत रहेकाले तत्काल ढुवानी गर्न नसकिए बिग्रने जोखिम रहेको पराजुलीले बताए। यसबाट विशेषगरी साना व्यवसायीले ठूलो आर्थिक क्षति बेहोर्नुपर्ने र नेपाली उपभोक्ताले बजारमा आवश्यक वस्तुको अभाव झेल्नुपर्ने अवस्था आउन सक्ने उनले उल्लेख गरे।

पराजुलीका अनुसार नेपाली पक्षका सम्बन्धित सडक निकाय र स्थानीय सरोकारवालाले सडकमा रहेका अवरोध हटाई सुरक्षित आवागमन पुनःस्थापना गरिसकेका छन्। भन्सार जाँचपास तथा सवारीसाधनको आवागमनका लागि सडक सञ्चालनयोग्य रहेको जानकारी दिँदै उनले नाका नियमित सञ्चालन गर्न आग्रह गरेका छन्।

यसअघि भदौ १० गते भोटेकोशी नदीमा आएको भीषण बाढीले रसुवा र नुवाकोटका विभिन्न बस्तीमा क्षति पुर्‍याएपछि चिनियाँ पक्षले भदौ १५ गतेदेखि अर्को सूचना जारी नभएसम्मका लागि तातोपानी नाका पूर्ण रूपमा बन्द गरेको थियो।

चाडपर्वको समयमा आयात–निर्यात प्रभावित भइरहेका बेला व्यवसायीहरूले नाका नियमित सञ्चालनमा ल्याउन सरकार र सम्बन्धित निकायमार्फत आवश्यक पहल गर्न माग गरेका छन्।