घुसकाण्डमा पनि सुनिल पौडेल दोषी ठहर

शेष अदालतले मंगलबार एकैदिन दुई ठूला भ्रष्टाचार मुद्दामा नेपाल टेलिकमका पूर्वप्रबन्ध निर्देशक सुनिल पौडेललाई दोषी ठहर गरेको छ । गैरकानुनी सम्पत्ति आर्जनसम्बन्धी एउटा मुद्दामा उनलाई साढे दुई वर्ष कैद तोकिएको छ भने घुससम्बन्धी अर्को मुद्दामा सजाय अझै तोकिन बाँकी छ । दुवै मुद्दामा गरी उनले साढे १५ करोड रुपैयाँभन्दा बढी अनियमितता गरेको ठहर भएको हो ।

दुवै मुद्दामा पौडेलले सिंगापुरस्थित बैंक मार्फत आर्थिक कारोबार गरेको पाइएको थियो । अख्तियारले उनको घरबाट उपकरण बरामद गर्दा सिंगापुरबाट भएको कारोबार खुलेको र त्यहीँ रकम लुकाएको आरोपमा उनी गैरकानूनी सम्पत्ति आर्जनको मुद्दामा समेत दोषी ठहर भएका हुन् ।

सिंगापुर खातामा २५ करोड
१२ करोड ७५ लाख रुपैयाँ अवैध सम्पत्ति आर्जन गरेको आरोपमा विशेष अदालतले पौडेललाई दुई वर्ष कैद तोकेको हो, जुन यस्ता मुद्दामा तोकिने अधिकतम सजाय हो । अध्यक्ष सुदर्शनदेव भट्ट, सदस्यहरू हेमन्त रावल र डिल्लीरत्न श्रेष्ठको इजलासले पौडेललाई १२ करोड ७५ लाख बिगो र त्यत्तिकै जरिवाना तिर्न तथा पीडित राहत कोषमा ५१ लाख रुपैयाँ जम्मा गर्न आदेश दिएको छ ।

जागिरे अवधिमा वैध रूपमा दुई करोड २१ लाख मात्र आर्जन गरेका पौडेलले बाँकी १४ करोड ९७ लाख अवैध रूपमा कमाएको अदालतको ठहर छ । अख्तियारले उनका विद्युतीय उपकरण जाँच गर्दा सिंगापुरको बैंक खातामार्फत विभिन्न कम्पनीबाट रकम लिने र भुक्तानी गर्ने गरेको भेटिएको थियो, जबकि उनले विदेशमा आफ्नो खाता नरहेको दाबी गरेका थिए । सिंगापुरी निकायको पत्र र फरेन्सिक प्रतिवेदनका आधारमा उक्त दाबी झुटो सावित भयो; त्यहाँ उनको खातामा १३ करोड ५३ लाख बराबरको विदेशी रकम जम्मा रहेको फेला परेको थियो ।

कमिसनको खेल
राष्ट्रिय सूचना प्रविधि केन्द्रको कार्यकारी निर्देशक हुँदा पौडेल ठेक्का प्रक्रिया र कोटेसन मापदण्ड बनाउने काममा प्रत्यक्ष संलग्न रहेको भन्दै अख्तियारले २०८१ वैशाखमा मुद्दा दायर गरेको थियो । वर्ल्ड डिस्ट्रिब्यूसन नेपाल, ओबीसीआई, म्याक्स इन्टरनेशनल र नेक्स जेन सोलुसनजस्ता कम्पनीलाई ठेक्का दिइएको र यी कम्पनीले विदेशी आपूर्तिकर्तासँग साझेदारी गरी कमिसन असुलेको आरोप थियो । विदेशी कम्पनीहरूले कमिसन बापत पौडेलको सिंगापुरस्थित युनाइटेड ओभरसिज बैंक खातामा रकम जम्मा गरेको फेला परेको थियो । नेपाल र सिंगापुर गरी २४ करोड ९४ लाख सम्पत्ति जोडेको आरोप लागेकोमा अदालतले भने त्यसमध्ये पुरानो कारोबारलाई भ्रष्टाचार नमानी हालैको खातामा भेटिएको रकमलाई मात्र अवैध ठहर गरेको छ ।

च्याटबाट खुलेको तीन करोड घुस
अर्को मुद्दामा विशेष अदालतले पौडेललाई तीन करोड ८ लाख रुपैयाँ घुस लिएको आरोपमा पनि दोषी ठहर गरेको छ । राष्ट्रिय सूचना प्रविधि केन्द्रबाट सामान खरिद गर्दा घुस लेनदेन भएको पुष्टि भएको भन्दै अदालतले २ करोड ८ लाख रुपैयाँको घुसकाण्डबाट ठेक्का टुंगिएको ठहर गरेको हो । सजाय र जरिवाना निर्धारणका लागि बिहीबार छुट्टै सुनुवाइ हुनेछ ।

यसै क्रममा एफ–फाइभ कम्पनीका प्रतिनिधि दिपक आनन्दलाई पनि घुस दिएको आरोपमा दोषी ठहर गरिएको छ । आर्थिक वर्ष २०७४/७५ मा सुरक्षा सफ्टवेयर र नेटवर्किङ उपकरण खरिदका क्रममा पौडेल र आनन्दले मिलेमतोमा लागत अनुमान तयार गरी अस्ट्रल कम्प्युटर्स नेपालको प्रस्ताव स्वीकृत गराएका थिए । ठेक्का टुंगिएपछि अस्ट्रलले १० लाख ५३ हजार डलर सिंगापुर पठाएको र सो रकम आनन्दले पौडेललाई घुसबापत उपलब्ध गराएको अख्तियारको दाबीलाई अदालतले सदर गरेको छ ।