सेन्ट जेभियर्सका ९१ विद्यार्थीले प्रकाशन गरे १५ न्यूजलेटर

सेन्ट जेभियर्स कलेजका सामाजिक कार्य र मनोविज्ञान विषयमा प्रमुख अध्ययन गर्दै पत्रकारितालाई ऐच्छिक विषयका रूपमा लिएका अन्तिम वर्षका विद्यार्थीले १५ वटा न्यूजलेटर प्रकाशन गर्दै आफ्नो शैक्षिक वर्षको समापन गरेका छन् । कलेजमा आयोजित न्यूजलेटर विमोचन समारोहमा विद्यार्थीहरूले विभिन्न समूहमा विभाजित भएर तयार पारेका १५ वटा न्यूजलेटर सार्वजनिक गरिएको हो ।

विद्यार्थीहरूले तयार पारेका न्यूजलेटरमध्ये दुई समूहले गैरसरकारी संस्था आशा नेपाल र अर्चिड गार्डेन नेपालका लागि क्रमशः ‘आशा आवाज’ र ‘द अर्चिड क्रोनिकल्स’ नामक न्यूजलेटर तयार गरेका छन् । यी न्यूजलेटरमार्फत विद्यार्थीहरूले कक्षाकोठामा हासिल गरेको ज्ञान तथा पत्रकारिता र सञ्चारसम्बन्धी सीपलाई वास्तविक संस्थागत कार्यसँग जोड्ने अवसर पाएका छन् ।

लेखन परियोजनामार्फत करिब १०० विद्यार्थी कक्षाकोठाको सिकाइलाई वास्तविक कार्यक्षेत्रसँग जोडिन पुगेका छन् । परियोजनाले विद्यार्थीलाई आफूले हासिल गरेको ज्ञान तथा सीप व्यवहारमा प्रयोग गर्ने अवसर दिनुका साथै रोजगारी बजार र सम्भावित रोजगारदातासँग प्रत्यक्ष रूपमा जोडिन सहयोग गरेको कलेजले जनाएको छ ।

न्यूजलेटर विमोचन कार्यक्रममा कलेजकी उपप्राचार्य सालुजा चन्द, मेजर आट्र्स विभागका प्रमुख शिशिरकुमार भुसाल, सहभागी गैरसरकारी संस्थाका प्रतिनिधि तथा कलेजका प्राध्यापकहरूको उपस्थिति थियो । कार्यक्रममा विद्यार्थीले तयार पारेका विभिन्न न्यूजलेटर सार्वजनिक गर्दै उनीहरूको परियोजनामार्फत प्राप्त व्यावहारिक सिकाइ र अनुभवलाई प्रस्तुत गरिएको थियो ।

कलेजका पत्रकारिता विषयका फ्याकल्टी लिड चुनबहादुर गुरुङले सञ्चार सीप सबै विषयका विद्यार्थीका लागि आवश्यक रहेको बताए । उनले कक्षाकोठामा सिकेको ज्ञानलाई व्यवहारमा रूपान्तरण गर्न लेखन परियोजनामार्फत विद्यार्थीलाई वास्तविक काममा संलग्न गराइएको बताए । उनका अनुसार यस्तो अभ्यासले विद्यार्थीलाई पाठ्यक्रममा सीमित ज्ञानभन्दा बाहिर गएर वास्तविक कार्यक्षेत्रमा आवश्यक पर्ने लेखन, सञ्चार र सामग्री उत्पादनसम्बन्धी सीप विकास गर्न सहयोग गर्छ ।

गुरुङका अनुसार सन् २०२३ ब्याचका ९१ जना विद्यार्थीले १५ वटा न्यूजलेटर तयार गरेका हुन् । तीमध्ये ‘आशा आवाज’ र ‘द अर्चिड क्रोनिकल्स’ दुई गैरसरकारी संस्था आशा नेपाल र अर्चिड गार्डेन नेपालका लागि तयार गरिएको हो । विद्यार्थीहरूले समूहगत रूपमा काम गर्दै सम्बन्धित संस्थाको आवश्यकता र विषयवस्तुलाई ध्यानमा राखेर न्यूजलेटर तयार गरेका थिए ।

कलेजका प्राचार्य फादर डा. अगस्टिन थोमस, एस.जे.ले विद्यार्थीलाई व्यावहारिक सिकाइ र वास्तविक संसारको काममा संलग्न गराउने पहल प्रशंसनीय रहेको बताए । उनले यस्तो परियोजनाले कक्षाकोठाको सिकाइलाई कार्यक्षेत्रसँग जोड्नुका साथै विद्यार्थीले आफ्नो ज्ञानलाई समुदायका लागि अर्थपूर्ण काममा प्रयोग गर्ने अवसर पाएको उल्लेख गरे ।

परियोजनाले विद्यार्थीको शैक्षिक ज्ञानलाई व्यवहारिक सीपमा रूपान्तरण गर्ने तथा उनीहरूको रोजगारीयोग्यता बढाउने उद्देश्यसमेत बोकेको कलेजले जनाएको छ । वास्तविक संस्थाका लागि सामग्री तयार गर्ने क्रममा विद्यार्थीले लेखन, सम्पादन, सञ्चार, समूहगत काम तथा व्यावसायिक कार्यप्रक्रियाको अनुभव हासिल गरेका छन् ।

कलेजका अनुसार विद्यार्थीको रोजगारीयोग्यता अभिवृद्धि गर्ने परियोजना–आधारित तथा सीप–आधारित शिक्षाको अवधारणासँग यो परियोजना विश्वविद्यालय अनुदान आयोगको रणनीतिक योजना २०२४–२०२९ सँग समेत मेल खान्छ । यसले उच्च शिक्षामा कक्षाकोठाको सैद्धान्तिक सिकाइलाई व्यावहारिक अनुभवसँग जोड्दै विद्यार्थीलाई भविष्यको रोजगारी र कार्यक्षेत्रका लागि तयार गर्ने अवधारणालाई प्राथमिकता दिएको छ ।