पिरो चाउचाउको लहरसँग जुध्दै वाइवाइ, सीजी फुड्सको आम्दानीमा गिरावट

नेपाली चाउचाउ बजारमा लामो समयदेखि हावी रहेको ‘वाइवाइ’ ब्रान्डलाई हाल बजारमा थपिएका पिरो स्वादका नयाँ उत्पादनहरूले चुनौती दिन थालेका छन् । उपभोक्ताको स्वाद बिस्तारै पिरो र भिन्न प्रकारका परिकारतर्फ ढल्किंदा चौधरी समूह अन्तर्गतको सीजी फुड्स नेपाल लिमिटेडको व्यापारमा असर परेको देखिन्छ ।

रेटिङ एजेन्सी इक्रा नेपालको हालैको प्रतिवेदनअनुसार, स्वदेशी र विदेशी दुवै किसिमका नयाँ ब्रान्डले पिरो चाउचाउमार्फत बजारमा तीव्र गतिमा प्रवेश गरेका छन्, जसको प्रत्यक्ष प्रभाव सीजी फुड्सको कारोबारमा परेको हो ।

आर्थिक वर्ष २०८०/८१ मा करिब ११ अर्ब ६७ करोड रुपैयाँ रहेको कम्पनीको समेकित सञ्चालन आम्दानी अघिल्लो आर्थिक वर्षमा झन्डै ३ प्रतिशतले घटेर ११ अर्ब ३५ करोड रुपैयाँमा सीमित भएको छ । नयाँ प्रतिस्पर्धीहरूको छिटो बजार पकड र उपभोक्ताको बदलिँदो रुचिले वाइवाइको दबदबालाई कमजोर बनाएको इक्रा नेपालको भनाइ छ ।

यसैगरी कम्पनीको नाफा मार्जिनमा पनि ठूलो गिरावट आएको छ । अघिल्लो वर्ष १२.१ प्रतिशत रहेको सञ्चालन नाफा मार्जिन गत वर्ष घटेर ६.६ प्रतिशतमा खुम्चिएको छ, जसको मुख्य कारण बढ्दो प्रतिस्पर्धा र कच्चा पदार्थको मूल्यमा आएको उतारचढाव हो । कम्पनीको कुल आम्दानीमा चाउचाउको हिस्सा अझै ७४ प्रतिशतभन्दा बढी भएकाले बदलिँदो बजार माग अनुसार ढल्नु नै सीजी फुड्सको प्रमुख चुनौती बनेको छ ।

यस दबाबबाट पार पाउन कम्पनीले निर्यात बढाउने र स्न्याक्स तथा पेय पदार्थ क्षेत्रमा लगानी विस्तार गर्ने रणनीति अघि सारेको छ । चालु आर्थिक वर्षको पहिलो नौ महिनामा नाफा मार्जिन केही सुध्रिए पनि पिरो चाउचाउको प्रतिस्पर्धालाई दीर्घकालीन जोखिमको रूपमा नियाल्नुपर्ने इक्रा नेपालको सुझाव छ । बदलिँदो उपभोक्ता रोजाइसँगै वाइवाइले आफ्नो बजार अगुवाइ जोगाउन नयाँ प्रतिस्पर्धीसँग कडा संघर्ष गर्नुपर्ने अवस्था देखिन्छ ।