दासढुंगामा मदन भण्डारी पार्क निर्माण अन्तिम चरणमा, पर्यटकीय र ऐतिहासिक गन्तव्य बनाउने तयारी
1 MIN READ
चितवनको भरतपुर महानगरपालिका–१९ स्थित ऐतिहासिक दासढुंगा क्षेत्रमा नेपाल कम्युनिस्ट आन्दोलनका प्रभावशाली नेता तथा तत्कालीन नेकपा एमालेका महासचिव मदन भण्डारीको स्मृतिमा निर्माण भइरहेको ‘मदन भण्डारी पार्क’ अन्तिम चरणमा पुगेको छ। पार्क निर्माणको उद्देश्य दासढुंगाको ऐतिहासिक महत्वलाई संरक्षण गर्दै भावी पुस्तालाई नेपालको राजनीतिक इतिहाससँग परिचित गराउनुका साथै यस क्षेत्रलाई व्यवस्थित पर्यटकीय गन्तव्यका रूपमा विकास गर्नु रहेको निर्माण पक्षले जनाएको छ। पार्क निर्माण सम्पन्न भएपछि दासढुंगा क्षेत्र इतिहास, राजनीतिक अध्ययन र आन्तरिक पर्यटनलाई एकैसाथ जोड्ने महत्वपूर्ण केन्द्रका रूपमा स्थापित हुने अपेक्षा गरिएको छ।
वि.सं. २०५० साल जेठ ३ गते मदन भण्डारी र तत्कालीन संगठन विभाग प्रमुख जीवराज आश्रित सवार जीप दासढुंगाबाट त्रिशूली नदीमा खस्दा दुवै नेताको निधन भएको थियो। नेपालको राजनीतिक इतिहासमा अत्यधिक चर्चित र लामो समयसम्म बहस तथा अनुसन्धानको विषय बनेको उक्त घटनास्थललाई संरक्षण गर्न तथा त्यससँग जोडिएको इतिहासलाई व्यवस्थित रूपमा प्रस्तुत गर्न स्मृति पार्क निर्माण सुरु गरिएको हो। यसमार्फत ऐतिहासिक घटनास्थललाई संरक्षण गर्दै नयाँ पुस्तालाई त्यस समयको राजनीतिक पृष्ठभूमिबारे जानकारी दिने लक्ष्य राखिएको छ।
पार्क निर्माणमा संलग्न मधु गुरुङका अनुसार दासढुंगा क्षेत्रलाई आधुनिक सुविधा सम्पन्न स्मृति तथा पर्यटकीय स्थलका रूपमा विकास गर्ने उद्देश्यले आवश्यक पूर्वाधार निर्माणलाई प्राथमिकता दिइएको छ। यसअघि यहाँ आउने पर्यटकका लागि आधारभूत सुविधा पर्याप्त नभएकाले उनीहरूले सहज रूपमा अवलोकन गर्न कठिनाइ हुने गरेको थियो। अहिले ती सबै कमजोरीलाई सुधार गर्दै व्यवस्थित, सुरक्षित र पर्यटकमैत्री संरचना निर्माण गरिएको उनले बताए।
मदन भण्डारी फाउण्डेसन पार्क निर्माण समितिका अध्यक्ष नारायणकुमार मगरका अनुसार पार्क निर्माणको मुख्य काम करिब साढे दुई महिनाको अवधिमा सम्पन्न गरिएको हो। निर्माण कार्य लगभग सकिए पनि केही भुक्तानी प्रक्रिया तथा सामान्य मर्मत, रेखदेख र कार्यालय भवनसँग सम्बन्धित केही काम भने अझै बाँकी रहेको उनले जानकारी दिए। उनका अनुसार पार्क निर्माणका लागि प्रदेश सरकारबाट विनियोजन गरिएको ४१ लाख रुपैयाँ बजेट खर्च गरिएको छ।
पार्कभित्र पर्यटकको सुविधा र आकर्षणलाई ध्यानमा राखेर विभिन्न संरचना निर्माण गरिएको छ। यहाँ एउटा पुल, दुईवटा गोलघर, कम्पाउण्ड वाल, पानी ट्याङ्की, शौचालय, फूल सजावटका लागि छुट्टै स्थान तथा कार्यालय भवन निर्माण गरिएको छ। त्यस्तै पार्कमा आउने आगन्तुकलाई सहज आवतजावतका लागि नारायणी नदीको किनारसम्म पुग्ने सिँढी निर्माण गरिएको छ। साथै मदन भण्डारी र जीवराज आश्रितको सालिक स्थापना गरिनुका साथै उनीहरूको सम्झना झल्काउने विभिन्न स्मृति संरचना पनि तयार गरिएको छ।
अध्यक्ष मगरका अनुसार यसअघि सामान्य अवस्थामा रहेको दासढुंगा क्षेत्र अहिले व्यवस्थित, आकर्षक र पर्यटकमैत्री रूपमा विकास गरिएको छ। पार्क क्षेत्रमा हरियाली प्रवर्द्धनका लागि दुबो रोप्ने, वातावरणीय सौन्दर्यीकरण गर्ने तथा थप आवश्यक पूर्वाधार विस्तार गर्ने कामसमेत गरिएको छ। आगामी दिनमा पार्कलाई अझ व्यवस्थित बनाउँदै यहाँ आउने पर्यटकलाई गुणस्तरीय सेवा उपलब्ध गराउने योजना रहेको उनले बताए।
निर्माण पक्षका अनुसार पार्कले राजनीतिक इतिहासको संरक्षण मात्र होइन, चितवनको पर्यटन प्रवर्द्धनमा पनि महत्वपूर्ण योगदान पुर्याउने अपेक्षा गरिएको छ। साथै स्थानीय स्तरमा रोजगारीका अवसर सिर्जना हुनुका साथै व्यवसायिक गतिविधि विस्तारमा समेत सकारात्मक प्रभाव पर्ने विश्वास व्यक्त गरिएको छ। स्थानीयवासीले पनि दासढुंगा केवल दुर्घटनास्थल मात्र नभई नेपालको महत्वपूर्ण राजनीतिक इतिहाससँग जोडिएको क्षेत्र भएकाले पार्क निर्माणले यसको ऐतिहासिक पहिचानलाई अझ मजबुत बनाउने धारणा राखेका छन्।
मदन भण्डारी नेपाली राजनीतिमा जनताको बहुदलीय जनवाद (जबज) का प्रतिपादकका रूपमा परिचित नेता हुन्। उनको राजनीतिक विचार, नेतृत्व र योगदानलाई भावी पुस्तासम्म पुर्याउने उद्देश्यले निर्माण गरिएको मदन भण्डारी फाउण्डेसन पार्क भविष्यमा राजनीतिक अध्ययन, ऐतिहासिक अवलोकन, अनुसन्धान तथा आन्तरिक पर्यटनको प्रमुख गन्तव्य बन्न सक्ने विश्वास सरोकारवालाहरूले व्यक्त गरेका छन्I