माछा मार्ने पुरानो गाउँ बन्यो कोइ माछाका कारण पर्यटकीय गन्तव्य

काठमाडौं । दक्षिण चीनको फोसानस्थित शताब्दी पुरानो माछा मार्ने गाउँ पछिल्लो समय कोइ माछासँग जोडिएको पर्यटनका कारण आकर्षक पर्यटकीय गन्तव्यका रूपमा विकसित भएको छ।

पहिले सामान्य माछा मार्ने बस्तीका रूपमा परिचित यो गाउँ अहिले कोइ माछाका भित्तेचित्र, मूर्ति र सुन्दर पोखरीका कारण पर्यटकको आकर्षणमा परेको हो। गाउँमा कोइ माछासँग सम्बन्धित स्मरणीय सामग्री बिक्री तथा विभिन्न पर्यटकीय गतिविधि पनि सञ्चालन हुँदै आएका छन्।

यहाँ पुग्ने पर्यटकले विभिन्न प्रजातिका कोइ माछा अवलोकन र समात्न पाउनुका साथै माछासँग तस्बिर खिच्ने अवसरसमेत पाउँछन्। स्थानीय परम्परा तथा अमूर्त सांस्कृतिक सम्पदासँग जोडिएका परिकारको स्वाद लिन सक्ने व्यवस्था पनि गरिएको छ।

गाउँले आफ्नो पहिचानलाई कोइ माछासँग जोड्दै सांस्कृतिक पर्यटनसँगै व्यावसायिक गतिविधिलाई समेत विस्तार गरेका छन्। गाउँको सांस्कृतिक पर्यटन विभागले हालै कोइ माछामा आधारित डिजिटल चित्रहरूको श्रृंखलासमेत तयार गरेको छ। ती सामग्री खेलौना र कपडा उत्पादन गर्ने कम्पनीहरूले खरिद गर्न थालेका छन्।

फोसान सुहे कल्चरल टुरिजम डेभलपमेन्ट कम्पनीका सञ्चालन व्यवस्थापक लिउ जियाक्वानका अनुसार ‘सुकुन कोइ’ सिरिजअन्तर्गत कोइ माछामा आधारित आठवटा डिजिटल उत्पादन तयार पारिएका छन्। अनलाइनमार्फत बिक्रीमा राखिएका ती सामग्रीको व्यावसायिक प्रयोगका लागि विभिन्न कम्पनीले लाइसेन्स लिन चासो देखाएका छन्।

कोइ माछालाई चिनियाँ संस्कृतिमा शुभभाग्य र समृद्धिको प्रतीक मानिन्छ। पछिल्ला वर्षमा कोइ माछामा केन्द्रित पर्यटकीय गतिविधि बढेसँगै गाउँको आर्थिक गतिविधिमा पनि उल्लेख्य वृद्धि भएको छ।

पर्यटकको आगमन बढेपछि गाउँको सामूहिक आम्दानीसमेत लाखौँ अमेरिकी डलरबराबर पुगेको बताइएको छ। यसबाट स्थानीय संस्कृति संरक्षणमा सहयोग पुग्नुका साथै स्थानीयवासीका लागि आयआर्जनका नयाँ अवसरसमेत सिर्जना भएका छन्।