अस्ट्रेलियामा भिसा नियम कडा, विदेशी विद्यार्थीले परिवार लैजान नपाउने

अस्ट्रेलियाले विदेशी विद्यार्थी तथा अस्थायी आप्रवासीका लागि भिसा नियम थप कडा बनाउने घोषणा गरेको छ। नयाँ व्यवस्थाअनुसार अस्ट्रेलियामा अध्ययन गर्न जाने अधिकांश विदेशी विद्यार्थीले आफ्ना पति–पत्नी, पार्टनर तथा सन्तानलाई ‘सेकेन्डरी आवेदक’का रूपमा आफूसँगै लैजान नपाउने भएका छन्। अस्ट्रेलियाका गृह मामिला मन्त्री टोनी बर्कले सार्वजनिक गरेको नयाँ आप्रवासन सुधारअन्तर्गत विद्यार्थी भिसा, पर्यटक भिसा, वर्किङ होलिडे भिसा र भिसा अनुपालनसम्बन्धी नियममा समेत परिवर्तन गरिने भएको छ। सरकारले सन् २०२८ सम्म वार्षिक शुद्ध आप्रवासन करिब २ लाख २५ हजारमा झार्ने लक्ष्य राखेको छ।

नयाँ अस्ट्रेलिया भिसा नियमअनुसार अधिकांश अन्तर्राष्ट्रिय विद्यार्थीका पति–पत्नी, पार्टनर र सन्तानलाई अस्ट्रेलिया लैजाने हालको व्यवस्था परिवर्तन हुनेछ। यद्यपि पीएचडी गर्न आउने विद्यार्थी, अस्ट्रेलियामै रहेका विद्यार्थी तथा उनीहरूका पार्टनर र केही प्रशान्त तथा दक्षिणपूर्वी एसियाली देशका विद्यार्थीका लागि अपवादको व्यवस्था रहने बताइएको छ। अस्ट्रेलियाले पर्यटक भिसाबाट अर्को भिसामा परिवर्तन गरी देशमै बसिरहने अभ्यासलाई रोक्न सबै भिजिटर भिसामा ‘नो फर्दर स्टे’ व्यवस्था लागू गर्ने तयारीसमेत गरेको छ।

अस्ट्रेलियाको नयाँ आप्रवासन नीतिले वर्किङ होलिडे भिसा र भिसा अनुपालनमा पनि प्रभाव पार्नेछ। वर्किङ होलिडे भिसा थप गर्न चाहने आवेदकका लागि बलट प्रणाली लागू गर्ने योजना छ भने भिसाको अवधि सकिएपछि पनि अवैध रूपमा बस्ने व्यक्तिमाथि निगरानी र कारबाही बढाइनेछ। सरकारले भिसा अनुपालन हेर्न थप १०० जना अधिकारी नियुक्त गर्ने योजना बनाएको छ। विद्यार्थी भिसा नवीकरणका लागि अध्ययनको तह माथि लैजानुपर्ने व्यवस्था पनि प्रस्ताव गरिएको छ।

अस्ट्रेलियाले पछिल्ला वर्षहरूमा विद्यार्थी भिसाको आवेदन शुल्क, अंग्रेजी भाषाको योग्यता तथा स्नातकपछिको भिसाका लागि आवश्यक आर्थिक मापदण्डसमेत कडा बनाउँदै आएको छ। विद्यार्थी भिसाको आवेदन शुल्क पछिल्लो चार वर्षमा करिब ३०० प्रतिशत बढेर २ हजार ५०० अस्ट्रेलियन डलर पुगेको बताइएको छ। अन्तर्राष्ट्रिय शिक्षा अस्ट्रेलियाको अर्थतन्त्रको महत्वपूर्ण क्षेत्र भए पनि सरकारले आप्रवासन नियन्त्रणका लागि विदेशी विद्यार्थीको आगमन र अस्थायी आप्रवासन व्यवस्थामा थप कडाइ गरिरहेको छ।