स्याङ्जामा बलेरो जिप पल्टिँदा एकको मृत्यु, दुई दर्जन घाइते

स्याङ्जाको वालिङ नगरपालिका–७ अन्तर्गत मिर्दि–चापाकोट सडकखण्डमा शुक्रबार एउटा बलेरो जिप दुर्घटनाग्रस्त हुँदा एक युवकको ज्यान गएको छ भने २० जना घाइते भएका छन्।

ताप्केबाट वालिङतर्फ गुडिरहेको उक्त जिप सडक किनारमा पल्टिएको थियो। दुर्घटनामा परी वालिङ–७ निवासी २५ वर्षीय राजेन्द्र बिरकट्टाको मृत्यु भएको प्रहरीले पुष्टि गरेको छ।

क्षमताभन्दा बढी यात्रु बोकेको सो जिपमा जम्मा २२ जना सवार रहेका थिए। घाइतेहरूलाई तत्काल वालिङ प्राथमिक स्वास्थ्य केन्द्रमा उपचारका लागि लगिएको थियो। प्रारम्भिक उपचारपछि १७ जनालाई पोखरा र २ जनालाई बुटवल रिफर गरिएको छ, जबकि एक बालकको उपचार वालिङमै जारी छ।

प्रहरीले जिपचालक वालिङ–७ निवासी २८ वर्षीय मीन बहादुर सारूलाई पक्राउ गरेको छ। दुर्घटनाको वास्तविक कारण पत्ता लगाउन अनुसन्धान जारी रहेको प्रहरीले जनाएको छ।

थप पढ्नुहोस्

• फिफा विश्वकप : शनिबार समूह जी, एच र आईका ६ खेल हुँदै
  
• संघर्षको परिवार, सफलताको नयाँ अध्याय : सांसद आकृति अवस्थी