हुलास फिनसर्भको नाफा दोब्बर नजिक, वितरणयोग्य रकम ७७ करोड नाघ्यो

काठमाडौं । व्यवसायी शेखर गोल्छा नेतृत्वको हुलास फिनसर्भ हायर पर्चेजले गत आर्थिक वर्ष २०८२/८३ मा ३९ करोड ८७ लाख रुपैयाँ खुद नाफा आर्जन गरेको छ, जुन अघिल्लो वर्षको तुलनामा ८४.४५ प्रतिशतले बढी हो । अघिल्लो वर्ष कम्पनीले जम्मा २१ करोड ६१ लाख रुपैयाँ मात्र नाफा कमाएको थियो । व्यवसायको आकार एक वर्षमै करिब एकतिहाईले विस्तार हुँदा खुद ब्याज आम्दानी २२ करोड १० लाखबाट बढेर ४८ करोड २३ लाख रुपैयाँ पुगेको छ भने कुल कर्जा लगानी ८ अर्ब २ करोड बाट ५२ प्रतिशतले बढेर १२ अर्ब २१ करोड नाघेको छ ।

कम्पनीले निष्क्रिय कर्जा व्यवस्थापनमा पनि उल्लेख्य सुधार गरेको छ, जुन अघिल्लो वर्षको ३.४० प्रतिशतबाट घटेर १.८७ प्रतिशतमा सीमित भएको छ । नाफा वृद्धिसँगै प्रतिसेयर आम्दानी (ईपीएस) २६.०४ बाट बढेर ४८.०४ रुपैयाँ पुगेको छ, जबकि वितरणयोग्य नाफा ७७ करोड ४० लाख रुपैयाँ रहेको छ, जसबाट कम्पनीले ९३ प्रतिशतसम्म लाभांश वितरण गर्न सक्ने अवस्था छ । हाल कम्पनीले बुक बिल्डिङ विधिबाट २० लाख ७५ हजार कित्ता सेयर सार्वजनिक निष्काशन (आईपीओ) ल्याउने तयारी गरिरहेको छ ।