जलवायु परिवर्तनले बढायो सगरमाथा आरोहणको जोखिम, अनुभवका आधारमा अनुमति दिनुपर्ने पासाङ दावा शेर्पाको सुझाव

विश्वकै सर्वाधिक ३१ पटक सगरमाथा आरोहण गरेका पासाङ दावा शेर्पाले जलवायु परिवर्तनका कारण हिमाली क्षेत्रमा देखिएको तीव्र परिवर्तनले सगरमाथा आरोहण थप जोखिमपूर्ण बन्दै गएको बताएका छन्। उनले आरोहण अनुमति संख्या सीमित गर्नु मात्र समाधान नभई पर्याप्त अनुभव र योग्यता भएका आरोहीलाई प्राथमिकता दिनुपर्ने धारणा व्यक्त गरेका छन्।

अन्य उच्च हिमाल आरोहणको अनुभव भएका पर्वतारोहीलाई अनुमति दिँदा दुर्घटनाको जोखिम कम हुने उनको विश्वास छ। पछिल्ला वर्षहरूमा हिमपातको समय परिवर्तन हुनु, हिमनदी पग्लिनु, खुम्बु आइसफलको मार्ग परिवर्तन हुनु तथा बरफ कमजोर बन्दै जानुले आरोहण थप चुनौतीपूर्ण बनेको उनले उल्लेख गरेका छन्।

सरकारले आरोहण शुल्क बढाउनुका साथै नयाँ नियम लागू गरे पनि जलवायु परिवर्तनका कारण सिर्जित जोखिम न्यूनीकरणका लागि अनुभवमा आधारित अनुमति प्रणाली आवश्यक रहेको उनको भनाइ छ।