तस्बिरदेखि भोलिको फाइनलसम्म : मेस्सी र यामालको अविश्वसनीय यात्रा

अर्जेन्टिनाका कप्तान लियोनल मेस्सी र स्पेनका उदीयमान स्टार लामिन यामालबीचको सम्बन्ध देखाउने झण्डै दुई दशक पुरानो एउटा तस्बिरले फेरि चर्चा पाएको छ । सन् २००८ मा खिचिएको मेस्सी र सानो बालक यामालको यो तस्बिर अहिले २०२६ फिफा विश्वकप फाइनलअघि विश्वभर भाइरल बनेको छ ।

डी-स्पोर्ट्सले सार्वजनिक गरेको भिडियोमा मेस्सीले यो संयोगलाई अत्यन्त अचम्मलाग्दो भन्दै यामाल सानो बालक हुँदा खिचिएको तस्बिर अहिले दुवै खेलाडी विश्वकप फाइनलमा प्रतिस्पर्धा गर्ने अवस्थासम्म आइपुग्नु आफैंमा असाधारण भएको बताएका छन् । तस्बिर खिच्दाको समयमा यामाल केवल एउटा शिशु थियो भने अहिले दुवै विश्वकपको उपाधिका लागि खेल्दैछन् भन्ने कुरा मेस्सीका लागि विश्वास गर्नै गाह्रो भएको उनले सुनाए ।

करिब १८ वर्षअघि बार्सिलोनाका खेलाडी रहेका मेस्सी क्याटलान पत्रिका डियारियो स्पोर्टको च्यारिटी फोटोसुटमा सहभागी हुँदा यामालसँग भेटेका थिए । क्याम्प नोउ रंगशालामा भएको सो फोटोसुटमा त्यतिबेला २० वर्षीय मेस्सीले शिशु अवस्थाका यामाललाई उनकी आमा शिला एबेना नजिकै राखेर तस्बिर खिचाएका थिए । त्यतिबेला मेस्सी विश्व फुटबलका उदीयमान खेलाडी थिए भने यामाल भविष्यमा स्पेनको प्रमुख प्रतिभा बन्ने कुरा कसैले सोचेका थिएनन् । यो तस्बिर स्वतन्त्र फोटोग्राफर जोन मोनफोर्टले खिचेका थिए ।

संयुक्त राष्ट्रसंघीय बाल कोष (युनिसेफ)ले पनि यो तस्बिर सामाजिक सञ्जालमार्फत सार्वजनिक गर्दै मेस्सी र यामालको सद्भावना दूतको रूपमा बालबालिकाको हितमा गरेको योगदानलाई उल्लेख गरेको छ ।

यसैबीच, २०२६ फिफा विश्वकपको फाइनलमा साविक विजेता अर्जेन्टिना र युरोपियन च्याम्पियन स्पेन भिड्न लागेका छन्, जुन खेल अनुभवी मेस्सी र किशोर यामालबीचको प्रतीकात्मक पुस्तान्तरण भिडन्तका रूपमा पनि हेरिएको छ । स्पेनले फ्रान्सलाई २–० ले र अर्जेन्टिनाले इंग्ल्यान्डलाई अन्तिम समयको निर्णायक गोलमार्फत २–१ ले हराउँदै फाइनलमा प्रवेश गरेका हुन् । फाइनलअघि गोल्डेन बुट दौडमा शीर्षमा रहेका मेस्सीले सेमिफाइनलमा दुई असिस्ट गर्दै फ्रान्सका कप्तान किलियन एमबाप्पेलाई समेत उछिनेका छन् ।