गगन थापा : एमाले–माओवादी मिले पनि सरकारमा जाँदैनौं

काठमाडौं । प्रदेशमा तीन ठूला दल मिलेर सरकार बनाउँदा संसद नै प्रतिपक्षविहीन हुने भन्दै नेपाली कांग्रेसले त्यस्तो प्रस्ताव स्वीकार्न नसकिने प्रस्ट पारेको छ।

कांग्रेस सभापति गगन थापाका अनुसार प्रदेशमा कांग्रेस, एमाले र माओवादी केन्द्र गरी तीनवटै दल मिलेर सरकार बनाउने प्रस्ताव आए पनि पार्टीले त्यसलाई अस्वीकार गरेको छ। सरकार गठन असम्भव भएमा मात्र दुई दल मिल्नु बाध्यता हुने उनको भनाइ छ।

‘प्रतिपक्ष नै नरहने गरी तीनवटै ठूला दल मिल्नु अलोकतान्त्रिक हुन्छ। त्यस्तो अवस्थामा एमाले र माओवादी नै मिलेर सरकार बनाउन सक्छन्, हामी बाहिरै बस्न तयार छौं,’ थापाले अनलाइनखबरसँग बताए।

सुदूरपश्चिमका मुख्यमन्त्री कमलबहादुर शाहले ल्याएको बजेटमा एमालेले सहयोग नगरेपछि नै दुई दलबीचको सहकार्यमा दरार आएको कांग्रेसको बुझाइ छ। महामन्त्री प्रदीप पौडेलका अनुसार एमालेले बजेट पुनर्लेखनको माग राखेको र त्यसका लागि पर्याप्त समय नभएकाले समस्या भएको हो, न कि प्रतिपक्षका कारण।

विवाद समाधानका लागि कांग्रेसका शीर्ष नेता एमाले अध्यक्ष केपी शर्मा ओलीलाई भेटेका थिए, जहाँ ओलीले नेकपालाई पनि सरकारमा समावेश गर्ने सुझाव दिएका थिए। तर त्यसो गर्दा प्रतिपक्ष नरहने भन्दै कांग्रेसले अस्वीकार गर्यो।

हाल कांग्रेसले एमालेसँगको सत्ता सहकार्य टुंगिएको ठहर गरेको छ, जबकि नेकपासँगको सम्भावना भने खुला राखेको छ। यसैबीच कर्णालीमा कांग्रेसका चार मन्त्रीले राजीनामा दिइसकेका छन् भने सुदूरपश्चिममा मुख्यमन्त्री शाहले एमालेका मन्त्री बर्खास्त गरिसकेका छन्।