सप्तरीमा किशोरको शव लुकाउन खोज्दै मोटरसाइकलमा भागेका भारतीय नागरिक पक्राउ

सप्तरीमा मोटरसाइकलमा शव राखेर भाग्न खोजेका एक भारतीय नागरिकलाई प्रहरीले पक्राउ गरेको छ। खडक नगरपालिका–१ को दिनाभद्री थान क्षेत्रनजिक शव फ्याँकेर भाग्ने प्रयासमा रहेका उनलाई स्थानीयवासीको सघाउमा प्रहरीले नियन्त्रणमा लियो। घटनामा संलग्न अर्को व्यक्ति भने अझै फरार रहेका छन्।

जिल्ला प्रहरी कार्यालय सप्तरीका अनुसार बुधबार शम्भुनाथ नगरपालिका–६ स्थित कठौना बजारमा एक किशोरलाई ठक्कर लागेपछि उनको मृत्यु भएको थियो। घटनापछि शव मोटरसाइकलमा राखी लैजाने क्रममा यी व्यक्तिहरू पक्राउ परेका हुन्। यो दुर्घटना हो वा हत्या भन्ने विषयमा थप अनुसन्धान भइरहेको प्रहरी प्रवक्ता एवं नायब उपरीक्षक हेमराज घिमिरेले जानकारी दिए।

मृतक किशोरको नाम मोहम्मद सादिक (१४) हो, जो शम्भुनाथ नगरपालिका–५ मोहनपुरका मोहम्मद सदामाका एक्ला छोरा थिए। पक्राउ परेका व्यक्तिको नाम मो. सादर नटला (२८) हो, जो भारतको मधुवनी जिल्लाको खुतौनी पिपराही स्थायी बासिन्दा हुन्।

यस घटनाको विरोधमा मृतकका आफन्त र स्थानीयवासीले बिहीबार बिहान पूर्व-पश्चिम राजमार्गको कठौना खण्डमा करिब ३० मिनेटसम्म सडक अवरुद्ध गरेका थिए।