मिटरब्याज पीडितसँग गृहमन्त्री गुरुङको प्रत्यक्ष संवाद, ६ बुँदे माग सम्बोधनमा दबाब

मिटरब्याज (सामन्ती ब्याज प्रथा) पीडितहरूको समस्या समाधानका लागि सरकारले पहलकदमी लिन थालेको छ । जनकपुरबाट काठमाडौँकेन्द्रित आन्दोलनका लागि पैदल यात्रामा निस्किएका पीडितहरूलाई भेट्न र उनीहरूको समस्याबारे प्रत्यक्ष कुराकानी गर्न गृहमन्त्री सुधन गुरुङ बाराको निजगढ पुगेका छन् ।

बुद्ध एयरको उडानबाट सिमरा विमानस्थलमा ओर्लेपछि मन्त्री गुरुङ सडकमार्ग भई तुरुन्तै निजगढ पुगेका थिए, जहाँ शिविर बनाई बसेका आन्दोलनकारीहरूसँग उनले तत्काल छलफल सुरु गरे । लामो समयदेखि न्यायको लागि सडकमा संघर्षरत नागरिकसँग मन्त्री स्वयं भेट्न पुग्नुलाई राजनीतिक तथा सामाजिक क्षेत्रमा गम्भीर चासोका साथ हेरिएको छ ।

आफ्नो घरजग्गा गुमाएका र मिटरब्याजी प्रथाको पूर्ण अन्त्य चाहने पीडितहरूले सरकारसमक्ष स्पष्ट ६ बुँदे माग राखेका छन्, जसमा फर्जी लिखत खारेजी, यससम्बन्धी विशेष कानुन निर्माण, स्वतन्त्र न्यायाधिकरण गठन र गुमेको सम्पत्ति फिर्ता प्रमुख रहेका छन् ।

छलफलमा गृहमन्त्री गुरुङले पीडितका मागप्रति सरकार गम्भीर रहेको र यस प्रथालाई कानुनी रूपमै समाप्त पार्न गृह मन्त्रालयले काम अगाडि बढाइरहेको बताए । यद्यपि पीडितहरूले विगतमा पनि यस्तै आश्वासन पाए पनि कार्यान्वयन नभएको स्मरण गराउँदै यसपटक ठोस र लिखित निर्णय नआएसम्म आन्दोलन तथा पैदलयात्रा रोक्ने छैनन् भन्ने अडान स्पष्ट पारेका छन् ।