रेफ्रीमाथि दबाब छैन : फिफा प्रमुख रेफ्री कोलिना

काठमाडौं । फिफाका प्रमुख रेफ्री अधिकारी पियरलुइजी कोलिनाले सन् २०२६ को विश्वकपमा खेल अधिकारीहरूको स्वतन्त्रता र निष्पक्षताको दृढतापूर्वक बचाउ गरेका छन् ।

प्रतियोगिताका केही निर्णयलाई लिएर विवाद चलिरहेकै बेला कोलिनाले रेफ्रीहरू कसैको प्रभावमा नरहेको स्पष्ट पारे । विशेषतः अर्जेन्टिना र इजिप्टबीचको ‘राउन्ड अफ १६’ खेलका निर्णयहरूमाथि प्रश्न उठेको थियो । खेलपछि फिफासँग कुरा गर्दै उनले रेफ्री टोलीको काम उचित रहेको बताए र भने, धेरै खेल छोटो समयमा हुँदा केही कुरा योजनाअनुसार नहुनु स्वाभाविक भए पनि रेफ्रीहरू अझै मिहिनेत गर्न तयार रहेको उनको भनाइ छ ।

इजिप्ट र अर्जेन्टिनाबीचको खेलमा इजिप्टले २–० ले अघि बढ्ने अवसर पाएको तर भिएआरको सहयोगमा एक गोल रद्द गरिएको थियो । रिप्लेमा इजिप्टका मिडफिल्डर मरवान अतियाले अर्जेन्टिनाका डिफेन्डर लिसेन्द्रो मार्टिनेजको खुट्टामा कुल्चिएको देखिएपछि उक्त निर्णय गरिएको थियो । यसलाई स्पष्ट पार्दै कोलिनाले खुट्टामा कुल्चिनु फाउल भएको र मैदानमा रेफ्रीले नदेखेको अवस्थामा भिएआरले हस्तक्षेप गर्न सक्ने नियम एकरूपतापूर्वक लागू गरिएको बताए ।

रेफ्रीहरूको निष्ठामाथि प्रश्न उठाउनु उपयुक्त नभएको बताउँदै कोलिनाले फिफा अध्यक्ष जियानी इन्फान्टिनोले समेत रेफ्रीको काममा कुनै हस्तक्षेप नगर्ने र पूर्ण स्वतन्त्रता दिएको उल्लेख गरे ।

अमेरिकी खेलाडी फोलारिन बालोगुनको रेड कार्डपछिको निलम्बन फिफाले फिर्ता लिएको र त्यसमा अमेरिकी राष्ट्रपति डोनाल्ड ट्रम्पको चासो रहेको चर्चाका बीच पनि कोलिनाले रेफ्री विभाग पूर्ण स्वतन्त्र रहेको दोहोर्‍याए ।

इजिप्टका प्रशिक्षक होसाम हसनले फिफाले ‘फेयर प्ले’ पालना नगरेको र अर्जेन्टिनालाई फाइदा पुर्‍याएको आरोप लगाएका थिए । सो खेलमा इजिप्ट सुरुमा २–० ले अघि रहे पनि अर्जेन्टिनाले क्रिस्टियन रोमेरो, लियोनल मेस्सी र इन्जो फर्नान्डेजको गोलमार्फत ३–२ ले उत्कृष्ट पुनरागमन गर्दै क्वार्टरफाइनल प्रवेश गरेको थियो ।

कोलिनाले रेफ्रीविरुद्ध लगाइने आधारहीन आरोपले उनीहरू र परिवारमाथि मानसिक तनाव र खतरा निम्त्याउने भन्दै यस्तो नगर्न आग्रह गरे । ४८ टोली सहभागी यस विश्वकपमा रेफ्रीको स्तर र निष्पक्षता कायम राख्न फिफा प्रतिबद्ध रहेको उनले जनाए । एएनआई