जाजरकोट–रुकुम पश्चिमको पुनर्निर्माणमा तीव्रता ल्याउन निर्देशन : गृहमन्त्री गुरुङ

गृहमन्त्री सुदन गुरुङले जाजरकोट र रुकुम पश्चिमका भूकम्प प्रभावित क्षेत्रमा पुनर्निर्माणको कामलाई तीव्र बनाउन सम्बन्धित प्रमुख जिल्ला अधिकारीहरूलाई निर्देशन दिइएको बताएका छन्। राष्ट्रियसभामा बोल्दै उनले सरकारले निजी आवास तथा सरकारी भवन पुनर्निर्माणका लागि आवश्यक बजेटको व्यवस्था गरिसकेको र प्राविधिक जनशक्ति थप गरी पुनर्निर्माणलाई प्रभावकारी बनाइने जानकारी दिए। साथै, सेवा प्रवाह, सुशासन र पुनर्निर्माणलाई आगामी आर्थिक वर्षको प्राथमिकतामा राखिएको उल्लेख गर्दै प्रभावित परिवारलाई समयमै राहत र पुनर्निर्माण सहयोग उपलब्ध गराइने प्रतिबद्धता व्यक्त गरे।