दुग्ध विकास संस्थानको घोटाला प्रतिवेदन सार्वजनिक गर्न र भारतमा नेपाली युवाको शंकास्पद मृत्यु छानबिन गर्न चौलागाईंको माग

राष्ट्रिय स्वतन्त्र पार्टी (रास्वपा)का सांसद मधुकुमार चौलागाईंले दुग्ध विकास संस्थान (डीडीसी) भित्र भएको भनिएको अनियमितताको छानबिन प्रतिवेदन सार्वजनिक गर्न र दूध किसानको बक्यौता भुक्तानी सुनिश्चित गर्न सरकारसँग माग गरेका छन्।

सोमबार बसेको प्रतिनिधि सभाको बैठकमा बोल्दै उनले अर्थ मन्त्रालयले २०८१ सालमा डीडीसी भित्रको अनियमितता छानबिन गर्न समिति गठन गरेको र सो समितिले मेसिन तथा औजार खरिदमा १ करोड १७ लाख रुपैयाँ बराबरको अनियमितता भएको निष्कर्ष सहितको प्रतिवेदन बुझाएको बताए। सो प्रतिवेदन हाल कहाँ रहेको, कहिले सार्वजनिक हुने र किसानले कहिले भुक्तानी पाउने भन्ने प्रश्न उठाउँदै उनले सरकारको ध्यानाकर्षण गराए।

साथै, चौलागाईंले रोजगारीका लागि भारत गएका काभ्रेको नवबुद्ध गाउँका एक नेपाली युवाको शंकास्पद मृत्युको विषय पनि सदनमा उठाए। उनका अनुसार सो युवाको यही महिनाको १३ गते भारतमा मृत्यु भएको थियो र परिवारले समेत यसलाई शंकास्पद रहेको बताएका छन्, तर सरकार यस विषयमा अनभिज्ञ देखिएको उनको भनाइ छ। उनले घटनाको निष्पक्ष अनुसन्धान गर्न सरकारसँग माग गरे।