विगत ४ वर्षमा विकासको पदचाप, सम्पदा तथा सामाजिक क्षेत्रका प्रयास सुनाउँदै वडा नं. ८ ले भन्यो – नागरिकको अपेक्षा हामीले पछ्याउने बाटो हो

काठमाडौँ महानगरपालिका वडा नं. ८ ले विगत चार वर्षमा गरेका विकास निर्माण, सम्पदा संरक्षण र सामाजिक कार्यक्रमहरूको विवरण नागरिकसमक्ष प्रस्तुत गरेको छ। चालु आर्थिक वर्षको सार्वजनिक सुनुवाई र आगामी वर्षको योजना तर्जुमाका लागि आयोजित कार्यक्रममा वडाध्यक्ष तथा महानगरपालिकाको सम्पदा र पर्यटन समिति संयोजक आशामान संगतले यी उपलब्धिहरू सार्वजनिक गर्नुभएको हो।

वडाध्यक्ष संगतका अनुसार भौतिक पूर्वाधार निर्माणसँगै मूर्त र अमूर्त सम्पदाको संरक्षण, आर्थिक–सामाजिक विकास र सुरक्षामा वडाले उल्लेख्य काम गरेको छ, जसलाई उपस्थित नागरिकले ताली बजाएर समर्थन गरे।

जयबागेश्वरी, पशुपति र गुह्येश्वरी क्षेत्र रहेको यस वडामा हराएका मन्दिर र इनारहरूको उत्खनन तथा पुनर्निर्माण, परम्परागत फसाद र इँटा–ढुङ्गाको शैली पुनर्स्थापना, र एक दर्जनभन्दा बढी ऐतिहासिक फल्चा–डवलीहरूको जीर्णोद्धार गरिएको छ।

सुरक्षाका लागि वडाभर २७० सीसीटिभी क्यामेरा जडान, अव्यवस्थित तार व्यवस्थापन, स्पिड ब्रेकर तथा कन्केभ मिरर राखिएका छन्। यसबाहेक सडक बत्ती, खानेपानी पाइप विस्तार, ढल व्यवस्थापन र पार्क/खुला व्यायामशाला निर्माण पनि भएको छ।

सामाजिक क्षेत्रमा ज्येष्ठ नागरिकका लागि घरदैलो स्वास्थ्य सेवा, मासिक स्वास्थ्य शिविर, युवाका लागि विभिन्न सीप विकास तालिम र महिला सशक्तीकरण कार्यक्रमहरू सञ्चालन गरिएको छ। साथै परम्परागत बाजागाजा प्रशिक्षण, त्रिशुल जात्रालाई युनेस्को सूचीमा दर्ता गराउने पहल र विभिन्न खेलकुद प्रतियोगिता पनि आयोजना गरिएका छन्।

यी उपलब्धिका आधारमा वडा नं. ८ ले महानगर दिवसका अवसरमा ‘उत्कृष्ट वडा’ र वडाध्यक्ष संगतले ‘उत्कृष्ट वडाध्यक्ष’ पुरस्कार पाएका थिए। सुनुवाईमा सहरी सुरक्षा, ढल निकास, खानेपानी लगायतका विषयमा नागरिकले राखेका सुझावहरू आगामी आर्थिक वर्ष २०८३/०८४ मा सम्बोधन गरिने वडाध्यक्षले बताए।